Ўзбекистонда давлат олий ва касбий таълим муассасаларига қабул тест синовлари якунланди

Тест топширишда 610 минг абитуриентдан кўпроғи қатнашди

Ўзбекистонда давлат олий ва профессионал таълим муассасаларига кириш тест синовлари якунланди, хабар беради Билим ва малакаларни баҳолаш агентлиги матбуот хизмати.

Тест синовларининг сўнгги 23-июль кунида республика бўйича ўтказилган тест синовларида режадаги 45 520 нафар абитуриентдан 45 минг нафардан ортиқ киши иштирок этди.

Қайт этилишича, ўн кун давомида ўтказилган тест синовларида қатнашиши белгиланган жами 664 609 нафар абитуриентдан 610 000 нафардан ортиғи иштирок этган бўлса, тест синови топшириш тартиб-қоидаларини бузган 70 нафардан зиёд абитуриент жараёндан четлатилган.

Таъкидланишича, тест синови топширган абитуриентлар тўплаган баллари асосида тест синовларининг 10-куни натижалари 24-июль куни эълон қилингач, 25-июльдан бошлаб, 15 кун давомида — 8-августга қадар (шу куни ҳам) 2-босқич танловда иштирок этишлари, бунда таълим муассасаларини, таълим йўналишларини, таълим устуворликларини ва таълим шаклларини танлашлари мумкин.

Якуний натижа эса 2-босқич танлов муддати тугагандан кейин бир ҳафта ичида эълон қилинади.