Саида Мирзиёева янги қурилишлар шаҳарни ортиқча зўриқтирмасдан ривожлантириши кераклигини таъкидлади

Учрашувда пойтахтнинг шаҳарсозлик ва экологик муаммолари, шунингдек, янги қурилишларнинг инфратузилма, энергетика ва сув таъминотига тушаётган юкламаси муҳокама қилинди

Президент Администрацияси раҳбари Саида Мирзиёева йирик архитектура лойиҳалари ташаббускорлари, мустақил мутахассислар, урбанистлар ҳамда соҳавий студиялар ва олий ўқув юртлари вакиллари билан учрашув ўтказди.

Мирзиёеванинг сўзларига кўра, Тошкент шиддат билан кенгайиб бормоқда, шаҳарсозлик ва экология билан боғлиқ бугунги вазиятни инобатга олсак, унинг келажаги ҳар қачонгидан ҳам жиддий эътибор ва таҳлилни талаб қилмоқда.

Қайд этилишича, биргаликда ечим топилиши керак бўлган масалалар талайгина — муҳандислик коммуникациялари ва ижтимоий объектлар зиммасига катта юк тушаётганидан тортиб, электр ҳамда сув таъминоти муаммоларигача.

Жумладан, янги қурилишлар шаҳарни ривожлантиришга хизмат қилиши, қўшимча номутаносиблик келтириб чиқармаслиги ва ҳудудий тизимларни ортиқча зўриқтирмаслиги кераклиги билдирилди.

Олдимизда турган мақсадлар улкан, биз Тошкентни ҳар бир юртдошимиз ҳамда шаҳримиз меҳмонлари учун янада қулай, кўркам, озода ва хавфсиз масканга айлантириш ниятида бўлган бизнес вакилларига кўмаклашамиз. Айнан шундай ёндашув Янги Ўзбекистон сиёсатига тўла мос келади, — деди Мирзиёева.