Нижнекамскда дрон ҳужуми оқибатида жабрланган Ўзбекистон фуқаролари ватанга қайтарилди
Ватандошларга зарур тиббий, ҳуқуқий ва ташкилий ёрдам кўрсатилди
Татарстоннинг Нижнекамск шаҳрига дронлар ҳужуми оқибатида жабрланган Ўзбекистон фуқаролари ватанга қайтарилди. Бу ҳақда Миграция агентлиги матбуот хизмати хабар бермоқда.
Қайд этилишича, жорий йилнинг 10 август куни Нижнекамск шаҳрида содир бўлган фожиали воқеа оқибатида тан жароҳати олган Ўзбекистон фуқароларига зарур тиббий, ҳуқуқий ва ташкилий ёрдам кўрсатилган.
Хусусан, мураккаб жарроҳлик амалиётини бошдан ўтказган ўзбекистонликнинг ҳолати барқарорлашгач, тиббий эвакуация жараёнида шифокорлар кузатуви ва зарур тиббий шароитлар таъминланган.
Айни пайтда, ҳамюртларимизга Россия Федерацияси қонунчилигида белгиланган тартибда компенсация маблағларини олиш учун зарур ҳужжатларни расмийлаштириш ва тегишли ташкилотларга тақдим этиш билан боғлиқ масалалар назоратга олинган, — дейилади хабарда.
Eслатиб ўтамиз, 12 август куни Нижнекамскга уюштирилган ҳужум оқибатида ҳалок бўлган саккиз нафар фуқаронинг жасади Ўзбекистонга олиб келинган эди.
