Россия ва Украина ўт очишни тўхтатиш бўйича музокараларни бошлайди 

АҚШ президенти Доналд Трамп 19 май куни Россия раҳбари Владимир Путин билан телефон орқали суҳбатдан сўнг Россия ва Украина ўт очишни тўхтатиш бўйича музокараларни зудлик билан бошлашга келишиб олганини маълум қилди. Бу ҳақда Reuters хабар берди.

Бироқ Кремль бу борада аниқ муддат бермади ва жараён вақт талаб қилишини билдирди.

Трамп ўзининг ижтимоий тармоқдаги саҳифасида бу режани Украина Президенти Володимир Зеленский ҳамда Европа Иттифоқи, Франция, Германия, Италия ва Финляндия етакчиларига ҳам етказганини айтди. У Оқ уйда берган изоҳида «муайян прогресс бор»лигини таъкидлади.

Путин эса Трампга Россия ва Украина ўртасидаги бевосита мулоқотни қайта бошлашни қўллаб-қувватлагани учун миннатдорчилик билдирди. Унга кўра, томонлар бўлажак тинчлик битими юзасидан меморандум устида ишлаши мумкин.

Шу билан бирга, Европа етакчилари Россияга нисбатан санкцияларни кучайтиришга қарор қилганини билдирган бўлса-да, Трамп бу йўлдан боришга тайёр эмаслигини айтди. 

Россия эса дарҳол сулҳга рози бўлишдан бош тортиб, музокараларнинг босқичма-босқич боришини истамоқда. Кремль вакиллари ўт очишни тўхтатиш бўйича муддат белгиланмаганини маълум қилган.

Зеленский эса Украина, Россия, АҚШ, Европа давлатлари ва Буюк Британия иштирокида юқори даражадаги учрашув ўтказишни таклиф қилди. Музокараларга Ватикан, Туркия ёки Швейсария мезбонлик қилиши мумкин. Кремль Ватикан таклифини ижобий қарши олганини билдирди, бироқ музокаралар жойи борасида ҳали қарор қабул қилинмаган. Ҳозирча Россия Украина қўшинларининг айрим ҳудудлардан чиқишини ўз шартларидан бири сифатида қўймоқда.

Мутахассислар Трампнинг босими билан музокаралар қайта бошлангани, бироқ Россия реал сулҳга ҳозирча тайёр эмаслигини таъкидламоқда.