Тошкент метросининг яна 19 та бекатида кассалар ёпилади

Жорий йилнинг 1 февралидан бошлаб Тошкент метросининг яна бир нечта бекатларида кассалар ёпилади, деб хабар берди метрополитен матбуот хизмати.

Мазкур жараён доирасида жами яна 19 та метро бекатидаги кассалар ёпилиши режалаштирилган бўлиб, жорий йилнинг 1 февраль санасидан бошлаб улар кетма-кет ўз фаолиятини тўхтатади, — дейилади хабарда.

Шу билан бирга, кассалар ўрнига бир марталик QR-чипта берувчи инфокиоскалар ўрнатилиши белгиланган.

Маьлумот учун, Тошкент метрополитенида электрон тўлов тизимлари босқичма-босқич кенгайтирилиб, ҳозирда йўловчилар учун:

• банк карталари орқали тўлов;

• транспорт карталари орқали тўлов;

• юзни таниб олиш (Face ID);

• кафт орқали тўлов (Palm Pay);

• мобил иловалар орқали тўлов каби 10 дан ортиқ замонавий тўлов усулларидан фойдаланиш имкониятлари мавжуд.