Трамп Сурияга қўйилган санкцияларни бекор қилди

АҚШ президенти Доналд Трамп Саудия Арабистонида Суриянинг янги раҳбари Аҳмад ал-Шароа билан учрашув давомида Сурияни Исроил билан дипломатик алоқаларни тиклашга чақирди. Бу ҳақда Reuters хабар берди.

Трамп Сурияга нисбатан АҚШ томонидан барча санкциялар бекор қилинишини эълон қилган.

Учрашув Форс кўрфази давлатлари ва АҚШ етакчиларининг саммитидан олдин бўлиб ўтган. Тадбирда Саудия валиаҳд шаҳзодаси Муҳаммад бин Салмон иштирок этган, Туркия президенти Ражаб Тойиб Эрдўған эса видеоконференсия орқали қўшилган.

Қайд қилинишича, Трамп, Сурияга нисбатан санкцияларнинг бекор қилиниши мамлакатни тиклаш ва халқаро иқтисодий тизимга қайтариш имконини беришини таъкидлаган. Шароа эса ўз навбатида, терроризмга қарши кураш ва Сурия барқарорлигини тиклаш бўйича АҚШ билан ҳамкорликни кенгайтиришга тайёрлигини билдирган.

Шунингдек, учрашувда Саудия Арабистони АҚШга $600 млрд инвестиция киритишни ва $142 млрдлик қурол-яроғ сотиб олишни режалаштираётгани маълум қилинган.

Айрим АҚШ сиёсатчилари ушбу қарорларни танқид қилиб, Трампнинг Сурияга нисбатан янги сиёсатини хавфли деб аташмоқда. Исроил эса Сурияга санкцияларни бекор қилишга нисбатан эҳтиёткорлик билан ёндашмоқда.

Аl Jazeera’га кўра, Доналд Трамп Қўшма Штатлар мамлакатга нисбатан санкцияларни бекор қилишини айтганидан сўнг бутун Сурия бўйлаб байрамлар бошланган.