Андижонда Damas ҳайдовчисининг 47 минг долларини ўғирлаганлар ушланди
Андижон вилоятида Damas автомобилини тўхтатиб, унинг ичида бўлган 47 минг долларни олиб қочган шахслар қўлга олинди.
Қайд этилишича, Марҳамат туманида туғилган фуқаро катта миқдордаги пулларни «Дўстлик» чегара пости орқали Қирғизистонга олиб ўтмоқчи бўлган. Бундан хабар топган 28 ёшли эркак жиноий режа тузган ва уч кишини ўзига шерик қилиб олган.
Улар 24 сентябрь куни 17:30 ларда давлат рақамлари олиб қўйилган Spark’да Хўжаобод тумани «Манак» МФЙда ҳаракатланиб кетаётган жабрланувчининг Damas’ини тўхтатган. Гумонланувчилар машина ичида бўлган 12 минг доллар, шунингдек, иккала олд ўриндиқлари орасида жойлашган 35 минг долларни қўлга киритиб, воқеа жойидан қочиб кетган.
Туман ИИБ томонидан олиб борилган тезкор-қидирувлари давомида гумонланувчиларнинг шахсига аниқлик киритилган. Уларнинг бир нафари тошкентлик, икки нафари фарғоналик ва яна бир нафари андижонлик фуқаролардир. Гумонланувчиларга нисбатан қамоққа олиш эҳтиёт чораси қўлланилган.
