«Транзит йўли билан Ўзбекистонга кириб келганларнинг ҳеч бири мамлкатимизда қолмайди» — Ташқи ишлар вазири ўринбосари
Олий Мажлис Сенатининг ўн саккизинчи ялпи мажлисида Ташқи ишлар вазирининг биринчи ўринбосари Фарҳод Арзиев Ўзбекистоннинг Афғонистон бўйича позициясини маълум қилди, деб хабар бермоқда Олий Мажлис Сенати матбуот хизмати.
Маълум бўлишича, Ўзбекистон Афғонистондаги барча ички сиёсий кучлар ўртасида Афғонистоннинг янги ҳукуматини тузиш бўйича миллий муросага имкон қадар тезроқ эришишдан манфаатдорлиги таъкидланди ҳамда Ўзбекистон мазкур мамлакатда кенг вакилликка асосланган инклюзив коалицион ҳукуматни тузиш асносида тинчлик ўрнатилишини қўллаб-қувватлаши айтилди.
Бундан ташқари, Ўзбекистон Халқаро ҳамкорларига Афғонистондан фуқароларни транзит йўли билан хавфсиз жойга кўчириш борасидаги ишларига ёрдам бераётгани қайд этилди.
«Транзит орқали Афғонистондан чиқиб кетаётган фуқаролар белгиланган манзилга етиб бориши кафолатланган. Транзит йўли билан Ўзбекистонга кириб келганларнинг ҳеч бири мамлкатимизда қолмайди», — дейди Ташқи ишлар вазири ўринбосари.
