Хитой яна коронавирус ўчоғига айланиши мумкин
Хитойнинг Пекин университети олимлари мамлакат яна коронавирус очоғига айланиши мумкинлигини маълум қилди.
Пекин университети математиклари томонидан ўтказилган тадқиқотга кўра, агар Хитой саёҳат қилиш билан боғлиқ чекловларини олиб ташласа, кунига 630 мингдан ортиқ коронавирусга чалиниш ҳолатига дуч келиши мумкин. Мутахассисларнинг фикрича, ХХР фаолроқ эмлаш жараёни ёки махсус муолажаларсиз саёҳат қилиш билан боғлиқ чекловларини олиб ташлолмайди.
Қайд этилишича, Америка Қўшма Штатлари, Буюк Британия, Испания, Франция ва Исроилнинг август ойидаги маълумотларидан фойдаланган ҳолда математиклар агар Хитой ушбу мамлакатлар каби пандемияга қарши кураш тактикасини қўлласа, қандай вазият юзага келишини тахмин қилиб кўрган. Прогнозларга кўра, агар мамлакат ҳукумати АҚШнинг пандемия стратегиясини қўлламаса, Хитойда коронавирус билан боғлиқ янги ҳолатларнинг кунлик сони камида 637 минг 155 тага етади.
Мутахассисларнинг фикрича, чет эллик саёҳатчиларга нисбатан чекловларни юмшатиш мамлакатда коронавирус билан касалланиш даражасига салбий таъсир кўрсатади ва Хитой соғлиқни сақлаш тизимига катта юк бўладиган «кенг кўламли эпидемия»га олиб келади.
Маълумот учун 2021 йил ноябрь ойи бошида Хитойда коронавирус инфекциясининг янги авж олиши кузатилган, мамлакат ичида 93 та янги инфекция ҳолати қайд этилган. Аниқлик киритилишича, коронавирус мамлакат шимоли ва шимоли-шарқида, Ганьсу, Хэйлунцзян ва Ички Мўғулистон автоном вилоятида тарқалмоқда.
