Қонунчилик палатасида «Реклама тўғрисида»ги қонун қабул қилинди
Қонунчилик палатасининг 28 декабрдаги мажлисида кенг муҳокамаларга сабаб бўлган «Реклама тўғрисида»ги қонун қабул қилинди.
Маълум бўлишича, депутатлар кўпдан буён кенг жамоатчиликнинг эътиборини тортган «Реклама тўғрисида»ги қонун лойиҳасини кўриб чиққан. Қонун лойиҳасида рекламанинг айланиши соҳасида Вазирлар Маҳкамаси, Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги, шунингдек, Қорақалпоғистон Вазирлар Кенгаши, вилоятлар ва Тошкент шаҳар ҳокимликларининг аниқ ваколати белгилаб қўйилган.
Мазкур ҳужжат билан реклама ва ОАВ соҳасида фаолият юритадиган тадбиркорлар учун ортиқча бюрократик тўсиқлар ҳамда уларнинг фаолиятига ортиқча аралашувнинг олдини олиш мақсадида айрим нормалар бекор қилинади. Қайд этилишича, «Реклама тўғрисида»ги қонун лойиҳаси учинчи ўқишда қабул қилинган.
