Россияда ўзбекистонлик мигрантлар заҳарланди
Москвада ишчилар учун мўлжалланган ётоқхонада муҳожирлар заҳарланиши оқибатида бир киши вафот этди, уч киши шифохонага ётқизилди.
Маълум қилинишича, чет эллик ишчилар учун мўлжалланган, машиналарни ювиш учун жиҳозланган меҳмонхона эгаси ўзбекистонликларни ҳушидан кетган ҳолда топган. У ерга меҳмонлардан бирининг чақириғидан сўнг етиб келган. Муҳожир қўнғироқ қилиб, ўзларини ёмон ҳис қилаётганини айтишга улгурган. Ҳеч ким эшикни очавермагач, эгаси бузиб киришга мажбур бўлган.
Тез ёрдам етиб келиб, учтасининг ҳаётини сақлаб қолишга муваффақ бўлди, лекин биттасини қутқариб қолиш имкони бўлмади. Халос бўлганларнинг аҳволи оғир, улар шифохонада. Хонада на бўш шиша, на озиқ-овқат топилган.
Муҳожирлар ётоқхонага гиёҳванд модда таъсирида келиб, ҳушидан кетганлиги айтилмоқда.
