Бухорода 2 млрд сўмдан ортиқ суюқ никотиннинг ноқонуний олиб кирилиши тўхтатилди
Мазкур товарлар тегишли суд қарорига асосан белгиланган тартибда йўқ қилиниши билдирилди
Бухоро вилоятида қиймати 2,1 миллиард сўмлик суюқ никотинни ноқонуний олиб кириш ҳолати бартараф этилди, деб хабар қилди Божхона қўмитаси матбуот хизмати.
Маълум бўлишича, мамлакатга импорт божхона режими остида олиб кирилган юклар божхона ҳужжатларида парфюмерия маҳсулотлари ишлаб чиқариш учун мўлжалланган хомашё сифатида декларацияланган.
Бироқ юклар «Хавфни бошқариш тизими» томонидан «қизил йўлак»ка йўналтирилиб, божхона кўригидан ўтказилган. Текширув жараёнида махсус тезкор экспресс мосламаси ёрдамида олинган намуналар таҳлили натижасида маҳсулот аслида суюқ никотин экани аниқланган.
Кейинчалик Х. Сулаймонова номидаги Республика суд экспертизаси маркази томонидан берилган хулосада ҳам мазкур модда асосан электрон сигареталар ишлаб чиқаришда қўлланиладиган суюқ никотин эканлиги тасдиқланган.
Дастлабки ҳисоб-китобларга кўра, умумий оғирлиги 70 килограммни ташкил этган ушбу суюқ никотиннинг қиймати 2 миллиард 100 миллион сўмга тенг эканлиги қайд этилди.
Ҳозирда ҳолат юзасидан барча процессуал ҳаракатлар якунланган бўлиб, мазкур товарлар тегишли суд қарорига асосан белгиланган тартибда йўқ қилиниши таъминланади.
