Зеленский Путин ва Трамп билан учрашув таклифини билдирди

Украина президенти Володимир Зеленский Владимир Путин ва Доналд Трамп билан уч томонлама учрашув ўтказишга тайёр эканини билдирди. Бу ҳақда РБК-Украина хабар берди.

Зеленский, шунингдек, «Трамп–Путин», «Трамп–Зеленский» каби икки томонлама форматларга ҳам очиқлигини айтиб, учрашувларнинг бир вақтда, ягона жойда ўтишини исташини таъкидлаган.

Унинг сўзларига кўра, Украина томони Ватикан, Швейтсария ёки бошқа таклиф этиладиган жойларда техник даражадаги учрашувларга ҳам тайёр. Зеленский, агар зарур бўлса, ҳеч қандай олдиндан тайёргарликсиз, бевосита етакчилар учрашувини ҳам ўтказиш мумкинлигини билдирган.

Эслатиб ўтамиз, 16 май куни Туркиянинг Истанбул шаҳрида Россия ва Украина делегациялари ўртасида тўғридан-тўғри музокаралар бўлиб ўтганди.