Коронавирусга қарши вакцина олганлар саратонга чалиниши ҳақидаги хабарлар рад этилди
Ижтимоий тармоқларда коронавирусга қарши вакцина олган инсонлар ҳаёти хавф остида экани, ва улар саратонга чалиниши мумкинлиги ҳақида хабарлар тарқалди.
Ҳолат юзасидан Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Атабеков тушинтириш берди.
Аввало, ушбу хабарлар мутлақо асоссиз эканлигини алоҳида таъкидлаш керак. Маълумотларга кўра, пандемия бошлангандан то ҳозиргача дунё бўйича 710 миллион киши бу касалликка чалинган, 7 миллиондан кўпроғи ҳаётдан кўз юмди. Агар вакцина топилмаган ва эмлаш тадбирлари уюшқоқлик билан ўтказилмаганда, бу рақамлар бир неча баробар юқори бўлиши мумкин эди. Буни вакцина кашф этилгунга қадар ўтган бир йил давомида ўлим кўрсаткичи юқори бўлгани ҳам яққол тасдиқлайди, — деб таъкидлади Атабеков.
Шунингдек, у қўлланилган вакциналар геномга салбий таъсир қилмаслиги ва бу ўз исботини топгани билдирди. Тўғри, вакцинани қабул қилган айрим одамларда турли салбий ҳолатлар, масалан, нафас олиш қийинлашуви, тана ҳарорати ошиши ва юракнинг тез уриши каби белгилар кузатилган. Аммо бу вақтинчалик бўлиб, эмлангандан сўнг 2-3 кун ўтгач, барчаси ортда қолгани таъкидланди.
Бундан ташқари, тарқарлган материалда онкологик касалликлар хавфи ҳам вакцинага боғлиқлиги ва эмлашдан кейин танада пайдо бўлган салбий ҳолатдан қутулиш учун эса карабаш ва арслонпанжаси гиёҳларидан фойдаланиш тавсия этилгани, мутахассисларни таажжубга солиши билдирилди.
Бу соҳадан умуман йироқ бўлган одамнинг фикридан бошқа нарса эмас. Карабаш шамоллаш, нафас йўллари яллиғланишида, арслонпанжаси эса аёлларда гормонал ҳолатни мўътадил ушлаб туриш мақсадида қайнатма сифатида ишлатиб келинган. Шундан келиб чиқилса, ушбу икки гиёҳ вакцинадан кейин пайдо бўлган иммунитетга таъсир кўрсатиш ва йўқ қилиш хусусиятига эга эмас, — деди Нурмат Атабеков.
Қайд этилишича, пандемия даврида бир қатор вакциналар қўлланилиб, эпидемик вазият юмшатилган ва дунё бўйича миллионлаб инсонлар ҳаёти сақлаб қолинган.
