АҚШ элчихоналари хорижий талабалар учун виза беришни давом эттиради
АҚШ Давлат департаменти элчихона ва консулликларга талабалар учун виза учрашувларини қайта тиклаши мумкинлигини айтди. Бу ҳақда CNN хабар берди.
Маълум қилинишича, элчихоналар F, M ва J турдаги визалар учун мурожаат қилган талабаларни АҚШ фуқаролари, маданияти, ҳукумати ёки муассасаларига душманлик муносабатини аниқлаш мақсадида текширади.
Янги тартибга кўра, виза сўровчиларининг ижтимоий тармоқлардаги фаолияти ва «онлайн мавжудлиги» баҳоланади. Ариза топширувчилардан профилларини очиқ қилиш сўралади, онлайн фаоллик чеклангани эса яширишга уриниш сифатида талқин қилиниши мумкин.
Трамп маъмурияти даврида халқаро талабалар визалари бўйича қатор чекловлар жорий этилган, айрим визалар бекор қилинган эди. Янги тартиб бу борадаги сиёсатни юмшатган бўлса-да, хавфсизликка доир назорат кучайтирилган.
Низомга кўра, элчихона ходимлари талабгорларнинг интернетдаги ҳар қандай изини, шу жумладан консуллик кириш ҳуқуқига эга бўлган маълумотлар базаларини ҳам текширади.
Янги қоидалар барча янги ва қайтиб келаётган талабалар учун амал қилади. Элчихоналар 5 иш куни ичида ушбу низомни амалиётга жорий қилиши керак.
Эслатиб ўтамиз, аввалроқ Трамп маъмурияти талаба визаси учун янги суҳбатларни тўхтатишни буюргани ҳақда хабар бергандик.
