«Футболчиларимдан ғурурланаман, улар яхши ўйнашди», — Фабио Каннаваро

Ўзбекистон терма жамоаси бош мураббийи футболчилар хатоларга йўл қўйганини ва улар устида ишлашларини маълум қилди

Миллий жамоа бош мураббийи Фабио Каннаваро ўйиндан сўнг ташкил этилган матбуот анжуманида Ўзбекистон терма жамоасининг ўйини ҳақида фикр билдирди.

Ўйин қизиқарли ўтди. Иккинчи бўлимда биз ўйинни ўзгартиришга эришдик. Чап қанотдан имкониятлар яратдик. Ўйин назоратини ўз қўлимизга олишга ҳаракат қилдик. Авваламбор биз Ўзбекистонни бутун дунёга ижобий намойиш этиш учун бу ерга келдик. Мен доим жамоамга ўйин давомида фаол ҳаракат қилиш кераклигини айтиб келаман. Колумбия сингари жамоаларга қарши ўйнаш, тўпсиз ҳаракат қилиш осонмас. Умуман олганда, иккинчи бўлимда яхши ҳаракат қилдик, бироқ афсуски гол ўтказиб юбордик, — деди Каннаваро.

Фабио Каннаваро ушбу тарихий ўйин ёдда қолишини ва хатолар устида иш олиб борилишини таъкидлади.

Футболчиларимдан ғурурланаман. Улар яхши ўйнашди. Бугун қийин ўйин бўлди. Бундай стадионда, мухлислар қаршисида ўйнаш осон эмас. Лекин бу сизга кўпроқ мотивация бериши ҳам мумкин, — деди мураббий.