Тошкентда қайнотасига пичоқ урган фуқаро қамалди
Тошкент шаҳрининг Бектемир туманида фуқаро шаръий никоҳида бўлган аёли ўртасида келишмовчилик оқибатида унинг онасига тан жароҳати етказиб, отасига пичоқ урган. Бу ҳақда Олий суд матбуот хизматига таяниб «Дарё» хабар қилди.
Хабарга кўра, 2020 йилнинг 24 июль куни турмуш ўртоғи Д.Ҳ.ни йўқотиб қўйиб, у билан икки кун қўнғироқ қилиб боғлана олмаган. 26 июль куни қўнғироқ қилганида аёл Нурафшон шаҳрида яшовчи холасининг уйида эканлигини айтган, К.И. унинг гапларига ишонмай, хиёнатда гумон қилган. Шу куни эр унинг уйига борган ва эшик ёпиқлиги учун девор орқали ҳовлига сакраб тушган. Йўлини қайнонаси Г.Ҳ. тўсганида уни тирсаги билан туртиб юбориши оқибатда у йиқилиб, тан жароҳати олган.
Қайд этилишича, ҳолатни кўрган қайнотаси С.Ҳ. унинг ёнига келиб, бор кучи билан ёқасидан тортган. Бундан жаҳли чиққан К.И. чўнтагида бўлган сувенир пичоқ билан унинг кўкрак, қорин ва елка соҳасига тан жароҳати етказиб, ҳодиса жойидан яширинган. ИИБ ходимлари томонидан олиб борилган тезкор суриштирув ишлари натижасида К.И. ўз хонадонида қўлга олинган.
Таъкидланишича, Жиноят кодексининг 104-моддаси (қасддан баданга оғир шикаст етказиш) 3‑қисми «а» банди билан айбли, деб топилган. Судда у қилмишидан пушаймонлигини, ҳаммасини жаҳл устида қилганини айтган. Унга нисбатан Жиноят кодексининг 57‑моддаси (енгилроқ жазо тайинлаш)ни қўллаган ҳолда 5 йил озодликдан маҳрум қилиш жазоси тайинланган.
