Россияда ўзбекистонлик уч эркак мамлакатга қурут ва асал олиб киргани учун қўлга олинди

Россиянинг Челябинск вилоятида Тошкентдан келган уч эркак ноқонуний тарзда қурут ва асал олиб келгани учун қўлга олинди.

Маълум қилинишича, ўзбекистонлик эркаклар Тошкентдан келган йўловчиларнинг қўл юкларини текшириш вақтида ушланган. Уларнинг олдида 5 килограмга яқин қурут ва асал бўлган. Улар чорвачилик маҳсулотларига ҳужжатлар тақдим этмагани учун қўлга олинган.

Амалдаги қонунчиликка мувофиқ, ветеринария-санитария нуқтаи назаридан хавфли бўлган маҳсулотларни Россия ҳудудига олиб кириш тақиқланган ва улар олиб келинган мамлакатга қайтарилиши керак. Таъкидланишича, Ўзбекистон фуқаролари маъмурий жавобгарликка тортилган. Маҳсулотлар эса йўқ қилинади.