Ўзбекистонлик эркак Санкт-Петербургда ИИВ патент идорасини портлатиб юбориш билан таҳдид қилди
Санкт-Петербургда Ўзбекистон фуқароси патент бериш бўйича Ички ишлар вазирлиги идорасини портлатиб юбориш билан таҳдид қилгани учун қўлга олинди. Бу ҳақда «Комсомольская правда» хабар бермоқда.
Воқеа 3 июнь куни содир бўлган. Полицияга номаълум шахс Моисеенко кўчасидаги бинони портлатиб юбормоқчилиги ҳақида, хабар келиб тушган.
Ҳуқуқ-тартибот идоралари ходимлари бино ва унинг атрофидаги ҳудудни кўздан кечирган. Хавфли ҳеч нарса топилмагани туфайли эвакуация ишлари олиб борилмаган, дейилади баёнотда.
Кейинчалик маълум бўлишича, ёлғон таҳдид, Россияга ишлаш мақсадида келган 35 ёшли ўзбекистонлик томонидан айтилган.
Айбланувчи эркак қўлга олиниб, унга нисбатан террорчилик акти ҳақида ёлғон хабар бериш моддаси бўйича жиноят иши қўзғатилган.
