Европа Иттифоқи Доналд Трампни божхона тўловлари бўйича танқид қилди

Европа Комиссияси АҚШ президенти Доналд Трампни яқинда қабул қилинган тариф қарорлари ортидан юзага келиши мумкин бўлган савдо урушлари оқибатлари ҳақида огоҳлантирди. Бу ҳақида Deutsche Welle ёзмоқда.

Европа Иттифоқи Қўшма Штатларнинг Канада, Мексика ва Хитойга тарифлар жорий этиш қароридан афсусдалигини таъкидлади.

Очиқ бозорлар ва халқаро савдо қоидаларига риоя қилиш кучли ва барқарор иқтисодий ўсиш учун зарур. Тарифлар кераксиз иқтисодий бузилишларни келтириб чиқаради ва инфляцияни рағбатлантиради, «барча томонларга зарар етказади», деди Европа Иттифоқи расмийси.

Европа Иттифоқи вакилининг таъкидлашича, Европа Иттифоқи ноҳақ ёки ўзбошимчалик билан тарифларни жорий қилган ҳар қандай савдо шеригига «қатъий жавоб беради». 

Қўшма Штатлар билан савдо ва сармоявий алоқаларимиз дунёдаги энг йирик ҳисобланади. Бу борадаги улушлар юқори, — деди у. 

Европа Иттифоқи нуқтайи назаридан, ҳар икки томон ҳам мавжуд муносабатларни мустаҳкамлашга ҳаракат қилиши керак. Вакилнинг таъкидлашича, ҳозирда АҚШнинг Европа Иттифоқи маҳсулотларига қўшимча тарифлари маълум эмас.