Акмалхон Ортиқов: «Моддий ёрдам ололмаганлар маҳалла раиси, сектор раҳбари ёки ҳокимлик қошидаги штабга мурожаат қилиши керак»
Иқтисодий тараққиёт ва камбағалликни қисқартириш вазирининг биринчи ўринбосари Акмалхон Ортиқов моддий ёрдам ололмаган эҳтиёжманд оилалар маҳалла раисига, сектор раҳбарига, қониқарли жавоб бўлмаган тақдирда ҳокимлик қошидаги штабга мурожаат қилиш кераклигини айтди. Бу ҳақида «Кун.уз» хабар берди.
«Ижтимоий ҳимояга муҳтож бўлган, бироқ қандайдир сабабга кўра эҳтиёжманд оилалар рўйхатига киритилмаган ёхуд рўйхатга кирган бўлса-да ёрдам олмаган фуқаролар биринчи навбатда ўзлари яшаётган маҳалланинг раисига мурожаат қилишлари керак. Агар маҳалла раиси фуқаронинг мурожаатига ҳеч қандай реакция билдирмаса, қониқарли жавоб бермаса, у ҳолда мазкур ҳудудга масъул бўлган сектор раҳбарига мурожаат қилиш керак.
Бугунги кунда туманларда бошқарув секторларга ажратилган. Булар – туман ҳокими, прокурори, ИИБ ва ДСИ бошлиқлари. Моддий ёрдам пуллари тарқатилиши ҳам вилоятдаги 4 та сектор раҳбари орқали қуйи тизимлардаги сектор раҳбарлари зиммасига юклатилган. Улар мутасадди идоралар томонидан шакллантирилган эҳтиёжманд ва кўмакка муҳтож оилаларнинг рўйхатлари асосида нақд пулларни банкдан олиб, ўзларининг аҳолига шахсан топширишлари шарт. Жойлардаги масъуллар ишларнинг натижаси бўйича вилоятдаги 4 та сектор раҳбарига ахборот беришади, бунинг учун ҳисобдорлик белгиланган. Шу сабабли мазкур жараёнда қандайдир муаммо, тушунмовчилик юзага келса, уларга мурожаат қилган маъқул.
Бундан ташқари, вилоят ва туман ҳокимликлари қошида ҳокимларнинг иқтисодий масалалар бўйича биринчи ўринбосарлари бошчилигида махсус штаб ташкил этилган. Агар маҳалла раиси ва сектор раҳбарларига ёрдам пуллари ажратилмагани, ташкилий камчиликлар юзасидан қилинган мурожаатлар бўйича ўзгариш бўлмаган тақдирда мазкур масала бўйича ҳокимликлар қошидаги штабга мурожаат қилишни тавсия этамиз.
Агарда ажратилган пул муҳтож оилалар рўйхатига киритилган кимларгадир етмай қоладиган бўлса ёки моддий кўмакка муҳтож бўлса-да, рўйхатга киритилмай қолган бўлса, уларга қўшимча равишда маблағ ажратиш кўзда тутилган. Эътибор қилинса, дастлаб айни мақсад учун «Саховат ва кўмак» жамғармасининг ҳудудий бўлимларига 150 миллиард сўм берилиши кўзда тутилган эди, бироқ президент фармони билан 200 миллиард сўм ажратилди. 50 миллиард сўм мана шундай баҳсли вазиятларга ечим сифатида ажратилган», — дейди Акмалхон Ортиқов.
Вазир ўринбосарининг таъкидлашича, президент фармони билан ажратилган ёрдам бир марталик бўлиб, кейинги ойларда ҳам эҳтиёжманд оилалар учун худди шундай моддий ёрдам ажратилиши кўзда тутилмаган.
Аввалроқ Мингбулоқда ижтимоий ҳимояга муҳтож оилаларга 448 миллион, Булунғур туманидаги эҳтиёжманд оилаларга 358 миллион, Ромитанда 100 та оилага хайрия ёрдами тарқатилганди.
Шунингдек, Ўзбекистонда «Саховат ва кўмак» умумхалқ ҳаракати доирасида жами 390 минг 822 та оилага 164 миллиард сўмдан ортиқ ёрдам маблағи йўналтирилгани хабар қилинган эди.
