Тошкентда коронавирусга чалинган 56 ёшли аёл вафот этди
Тошкентда коронавирусга чалинган 56 ёшли аёл ўткир нафас, юрак қон-томир ҳамда полиорган етишмовчилигидан вафот этди.
Маълум қилинишича, Тошкент шаҳар Учтепа туманида яшаган 56 ёшли Д.Ш. (аёл)да COVID-19 тасдиқланган ва тана ҳарорати кўтарилиб, нафас етишмовчилиги кучайганлиги сабабли Тошкент тиббиёт академиясининг клиникасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир респиратор дистресс синдроми, ўткир нафас етишмовчилиги, ўпка шиши, полиорган етишмовчилиги асоратлари билан кечган.
Шунингдек, беморда юрак ишемик касаллиги, зўриқиш стенокардияси, гипертония, артериал гипертензия каби ҳамроҳ хасталиклар ҳам бўлган. Аёл ўткир нафас ва юрак қон-томир етишмовчилиги, ўпка шишидан вафот этган.
Маълумот учун, 2 август ҳолатига кўра, коронавирусдан вафот этганлар Ўзбекистонда 149 нафарни, Андижонда эса 2 нафарни ташкил этмоқда.
Шунингдек, 2 август соат 17:00 ҳолатига кўра, Ўзбекистонда коронавирус инфекцияси қайд этилганлар сони 25 336 (+296) нафарни ташкил этмоқда.
Аввалроқ Андижонда коронавирусга чалинган 63 ёшли бемор вафот этгани хабар қилинганди.
