Шавкат Мирзиёев Россия делегациясини қабул қилди
Шавкат Мирзиёев 2 декабрь, чоршанба куни Ўзбекистонда амалий ташриф билан бўлиб турган Россия президенти администрацияси раҳбарининг ўринбосари Дмитрий Козак бошчилигидаги делегацияни қабул қилди. Бу ҳақда Президент матбуот хизмати хабар берди.
Фото: Президент матбуот хизмати
Таъкидланишича, Шавкат Мирзиёев мулоқот давомида Ўзбекистон—Россия кўп қиррали ҳамкорлиги кейинги йилларда жадал суръат билан ривожланаётгани, стратегик шериклик ва иттифоқчилик муносабатлари мустаҳкамланиб бораётганини қайд этган.
«Дмитрий Козак Ўзбекистон Президентига самимий қабул учун миннатдорлик билдириб, Россия президенти Владимир Путиннинг саломи ва энг эзгу тилакларини етказди.
Бўлажак икки томонлама ва кўп томонлама форматдаги учрашувларга тайёргарлик кўриш ва уларни ўтказиш масалалари кўриб чиқилди. Ушбу тадбирлар кун тартибини аниқ амалий мазмун билан бойитишга алоҳида эътибор қаратилди», дейилади Пезидент матбуот хизмати хабарида.
Қабул жараёнида халқаро сиёсатнинг айрим жиҳатлари юзасидан ҳам фикр алмашилган.
Аввалроқ Шавкат Мирзиёев Афғонистон Миллий ярашув олий кенгаши раисини қабул қилгани ҳақида хабар берилганди. Шунингдек, Президент Россия президенти билан декабрь ойида ўтказиладиган МДҲ саммитига тайёргарлик масаласини муҳокама қилгани ҳақида хабар берилган.
