Тошкентда коронавирусга чалинган икки бемор полиорган етишмовчилигидан вафот этди

Тошкент шаҳрида коронавирусга чалинган икки бемор полиорган етишмовчилигидан вафот этди. Бу ҳақда Соғлиқни сақлаш вазирлиги хабар берди.

Биринчи ўлим. Мирзо Улуғбек туманида яшаган 69 ёшли бемор Н.Е. (аёл)да жорий йил 25 июль куни COVID-19 инфекцияси тасдиқланган ва нафас етишмовчилиги белгилари кучайганлиги сабабли Тошкент тиббиёт академияси клиникасига ётқизилган.

Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир респиратор дистресс синдроми, ўткир нафас ва юрак қон-томир етишмовчилиги асоратлари билан кечган. Шунингдек, бемор юрак ишемик касаллиги, гипертония каби ҳамроҳ касалликлар билан ҳам оғриган.

Иккинчи ўлим. Олмазор туманида яшаган 49 ёшли бемор Д.С. (аёл)да ҳам жорий йил 25 июль куни COVID-19 инфекцияси тасдиқланган ва бир неча кун давомида тана ҳарорати кўтарилганлиги, нафас етишмовчилиги кучайганлиги сабабли Вирусология илмий-текшириш институти клиникасига ётқизилган.

Унга ҳам COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир нафас етишмовчилиги, ўткир респиратор дистресс синдроми, полиорган етишмовчилиги асоратлари билан кечган. Шунингдек, бемор юрак ишемик касаллиги, гипертония ҳамроҳ касалликлар билан ҳам оғриган.

Ҳар икки бемор ўткир нафас, юрак қон-томир ва полиорган етишмовчилигидан вафот этган.

Эслатиб ўтамиз, 2020 йил 3 август соат 16:00 ҳолатига кўра, Ўзбекистонда коронавирус инфекцияси қайд этилганлар сони 26 066 (+238) нафарни ташкил этмоқда.