Президент Сергели метро йўналиши қачон очилишини маълум қилди
Шавкат Мирзиёев метрополитеннинг Сергели йўналиши 2020 йилнинг декабрь ойи охирида очилишини маълум қилди. Бу ҳақда Президент матбуот хизмати хабар берди.
Фото: Президент матбуот хизмати
Қайд этилишича, давлат раҳбари бу ҳақда 4 декабрь куни Тошкент металлургия заводининг очилишига бағишланган тантанали тадбирда сўзлаган нутқида айтиб ўтган.
«Эсларингизда бўлса, биз коронавирус пандемиясидан кучли, қудратли бўлиб чиқамиз, деб мақсад қўйган эдик. Бугун бу мураккаб йил якунига етаётганда айтишимиз мумкинки, барча саъй-ҳаракатларимиз ижобий натижасини беряпти. Кўряпсизлар, дунёда нима бўляптию, Ўзбекистонда нима бўляпти. Худо хоҳласа, шу ойнинг охирида метрополитеннинг Сергели йўналишини ҳам очамиз. Илоҳим, мана шундай яхши кунларимиз кўп бўлсин», — деди Шавкат Мирзиёев.
Aввалроқ Президент Шавкат Мирзиёев 4 декабрь куни пойтахтнинг Янгиҳаёт туманида барпо этилган Тошкент металлургия заводининг очилиш маросимида иштирок этгани ва нутқ сўзлагани хабар қилинган эди.
Мавзуга доир: Видео: Сергелидаги ерусти метросининг синов поезди
Эслатиб ўтамиз, Шавкат Мирзиёев 29 август куни биринчи босқичи битказилган ерусти ҳалқа метросига ташриф буюргани хабар қилинганди. Маълум бўлишича, лойиҳа ишлари 2017 йилда бошланган. Қурилишнинг бориши давлат раҳбарининг доимий эътиборида бўлган.
Шунингдек, Президент шу куни Юнусобод йўналишининг янги қуриб битказилган Юнусобод ва Туркистон бекатларини ҳам бориб кўрган. «Бу йўл ҳамма нарсани тезлаштиради. Ҳаракатни ҳам, иқтисодиётни ҳам, ҳаётни ҳам», — дея таъкидлаган давлат раҳбари.
