Зангиотадаги юқумли касалликлар шифохоналарида иккита янги бўлим очилади
Тошкент вилояти Зангиота туманидаги юқумли касалликлар шифохоналарида иккита янги бўлим очилади. Бу ҳақда Соғлиқни сақлаш вазирлиги ахборот хизмати хабар берди.
Таъкидланишича, Ўзбекистонда эпидемик вазиятнинг барқарорлашаётганлиги муносабати билан аҳолига кўрсатиладиган шошилинч ва ихтисослаштирилган тиббий хизмат сифат ва самарадорлигини ошириш мақсадида Соғлиқни сақлаш вазирининг буйруғи билан Зангиота туманидаги 1-сон юқумли касалликлар шифохонаси таркибида коронавирусга чалинган ёки унга гумон қилинган шошилинч терапевтик ёрдамга муҳтож беморлар ҳамда ҳомиладорлар учун бўлим очилиши тасдиқланган.
Мавзуга доир: Зангиота юқумли касалликлар шифохоналарида коронавирусга оид илмий тадқиқотлар олиб борилади
Шунингдек, Зангиота туманидаги 2-сон юқумли касалликлар шифохонаси таркибида коронавирусга чалинган ёки унга гумон қилинган шошилинч хирургик ёрдамга муҳтож беморлар учун бўлим фаолиятини бошлаши ҳам белгиланган.
Аввалроқ Тошкентдаги яна 3 та шифохона коронавирусга чалинган беморларни қабул қилишни тўхтатгани ҳақида хабар берилганди. Шунингдек, Самарқандда тақсимлаш маркази ташкил этилгач, COVID-19 беморларини даволаб келган 5 та шифохона ўз йўналишига қайтгани ҳақида хабар берилган.