Олимлар коронавирусни 10 сонияда аниқлайдиган қурилма ихтиро қилди

Туркиянинг Билкент университети олимлари 10 сония ичида коронавирусни аниқлаш имкониятига эга бўлган қурилма ишлаб чиқди. Янги ихтиро анъанавий ПЗР тести ўрнини босиши мумкин. Бу ҳақда «Daily Sabah» нашри хабар берди.

Фото: «Daily Sabah»

Қайд этилищича, «Диагновир» деб номланган ихтиро атиги 10 сонияда 99 фоиз ишончли натижаларни беради. ПЗР синовларида ишлатиладиган бурун бўшлиғидан олинувчи намунага эҳтиёж қолмайди.

Бемордан олинган намуна махсус эритма билан аралаштирилади ва чипга туширилади. Биосенсорлар ҳар қандай патогенни юқори аниқликда аниқлайди. У ПЗР синовларида бўлгани каби намуналарни кўпайтириш учун эмас, балки илғор оптик усуллардан фойдаланган ҳолда вируснинг мавжудлигига ёки йўқлигига эътибор беради.

Олимлар нанотехнологияларга асосланган ихтирога халқаро патент олиш учун ҳужжат топширган. Туркиядаги соғлиқни сақлаш идораси рухсат берганидан сўнг оммавий ишлаб чиқариш учун яна 2 ой вақт керак бўлади, дейилади хабарда.

Аввалроқ россиялик доктор коронавирусни аниқлашнинг оддий йўлини маълум қилганди. Шунингдек, Нигерияда COVID-19 туфайли очарчилик бошлангани хабар қилинган.