Ўзбекистонга 100 млн сўмлик компьютер эҳтиёт қисмларини ноқонуний олиб кираётганлар ушланди

Тошкент халқаро аэропортида 100 миллион сўмлик компьютер эҳтиёт қисмларини Ўзбекистонга ноқонуний олиб кираётганлар ушланди. Бу ҳақда Божхона бошқармаси ахборот хизмати «Tez News»га хабар берди.

Фото: Божхона бошқармаси ахборот хизмати

Маълум қилинишича, хорижий авиарейс билан Тошкент халқаро аэропортига учиб келган фуқаролар К.А. ва Ю.З.ларга тегишли бўлган юклар сканер қурилмалари ёрдамида кўздан кечирилган. Натижада, юклар орасидаги картон қутидаги компьютер кейсида божхона назоратидан яшириш мақсадида жойлаштирилган, умумий қиймати 100 миллион сўмлик компьютер эҳтиёт қисмлари борлиги аниқланган.

Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда.

Аввалроқ Тошкентда 11 миллион сўмлик буюмларни Ўзбекистонга ноқонуний олиб кирмоқчи бўлган шахс ушлангани ва Бувайдада машинасида ҳеч қандай ҳужжати бўлмаган 20,2 млн сўмлик телевизорларни олиб кетаётган ҳайдовчи ушлангани  ҳақида хабар қилинганди. Шунингдек, Наманган шаҳрида машина юкхонасида 900 дона кучли таъсир қилувчи дорини олиб кетаётган ҳайдовчи қўлга олингани ҳақида хабар берилганди.