Самарқанддаги мактаб, боғча ва шифокорлик пунктида қурилиш талабларини бажармаслик ҳолатлари фош этилди
Самарқанд вилояти Пайқариқ тумани 34-сонли умумтаълим мактабида қўшимча 180 ўринли янги ўқув биноси қурилиши давомида қурилиш меъёрларидан четлашилгани аниқланди.
Хусусан, қурилиш майдони ҳудуди белгиланган тартибда ўралмаган, мактаб болалари шундоқ қурилиш майдони ёнидан ўтиб-қайтади. Бино пойдеворининг шамоллатиш туйнуклари лойиҳада диаметри 150 миллиметр бўлиши кўрсатилган, бироқ қурувчи томонидан 50 миллиметр ўлчамда туйнук қолдирилган.
Бино деворларига терилган ғиштларнинг айримларига цемент-қум қоришмаси тўлдирилмаган. Лойиҳадан четлашган қурувчининг камчиликлари Самарқанд вилояти Қурилиш ва уй-жой коммунал хўжалиги соҳасида ҳудудий назорат инспекцияси томонидан давлат дастурлари асосида қурилаётган ижтимоий соҳа объектларида ўтказилган назорат тадбирлари давомида фош бўлган.
«Аниқланган камчиликлар бўйича кўрсатмалар берилди, ушбу кўрсатмаларни ўз вақтида бажариб берамиз», — дейди қурилиш масъули.
Шунингдек, инспекция ходимлари туманнинг «Накурт» маҳалласи ҳудудида «Бошмоқ» оилавий шифокорлик пунктининг қурилиш биносида бўлган. Ушбу объектда ҳам бир нечта қурилиш талаблари бузилаётгани аниқланган.
Назоратчилар бундан ташқари, туманнинг «Катта сайдо» маҳалласида қурилаётган мактабгача таълим ташкилоти биносида бўлиб, қатор камчиликларни аниқлади. Масалан, бино пойдеворининг ташқи ҳимоя қисмига лойиҳада кўрсатилган қурилиш материаллари эмас, балки сифатсиз материаллардан фойдаланилган.
«Бинонинг ташқи ҳимоя қисмига базалтдан фойдаланиш кўрсатилган, лекин жойида пенопластдан фойдаланилган. Умуман олганда, юқоридаги объектларда техник ва муаллифлик назорати ўз вақтида юритилмаган. Объект паспортлари мавжуд эмас, ёки кўринарли жойга илинмаган», — дейди Самарқанд вилояти қурилиш назорати инспекцияси матбуот хизмати раҳбари.
Шу билан бирга, Иштихон туманида қурилаётган сув иншооти ҳам кўздан кечирилган. Бу ерда ҳам ётқизилаётган қувур ўлчаб кўрилганида, лойиҳада кўрсатилган нуқтага нисбатан паст бўлиб чиққан. Қурилиш ташкилотларига йўл қўйилган камчиликларни белгиланган муддатда бартараф этиш бўйича тегишли кўрсатмалар берилган. Кўрсатмалар ўз вақтида бажарилмаса, қурилиш корхоналарига нисбатан қонуний чоралар кўрилади.
