ИИБ ижтимоий тармоқларда тарқалган икки қизнинг ушланиши билан боғлиқ видео юзасидан расмий изоҳ берди
Ижтимоий тармоқларда тарқалган икки нафар қизнинг ушланиши билан боғлиқ видеотасвир юзасидан расмий маълумот берилди. Бу ҳақида Ички ишлар бош бошқармаси хабар берди.
Маълумотларга кўра, ППХ бригадаси 3 батальон 5 отряд ходимлари сафдорлар Б.Мирзахакимов ва А.Худойбердиевлар 3 август куни соат 12:30 ларда Юнусобод тумани Абдулла Қодирий ва Шароф Рашидов кўчаларининг кесишмасида хизмат олиб бораётган вақтида чорраҳада икки нафар қиз тиланчилик қилаётганлигини аниқлаган. Ушбу қизлар ўзининг хатти-ҳаракатлари билан йўлнинг серқатнов қисмида тирбандлик ҳолатини юзага келтириб, транспорт воситалари ҳайдовчиларига халақит берган.
Қизлар ўрнатилган қонун қоидаларни бузаётганлиги тушунтирилиб, уларга яқин орадаги Юнусобод тумани ИИБга бориши сўралган. Бироқ 18 ёшли С.Э. ва 19 ёшли Ш.А. ходимларга фаол қаршилик кўрсатган. Уларни ҳақорат қилган ва атрофдаги одамларнинг диққатини тортиш мақсадида шовқин кўтарган. Ходимлар қўшимча кучларни чақириб, ушбу қизларни ИИБга олиб келган.
Профилактика инспектори ушбу фуқаролар билан профилактик тушунтириш ишларини олиб бориб, тиланчилик қилганлик учун жавобгарлик белгиланганлигини маълум қилган. Улар томонидан бу ҳолат биринчи маротаба содир этилаётганлиги сабабли қизларга огоҳлантириш берилган.
Аввалроқ Aндижонда синфдошлар билан «ўтиришда» маст бўлган фуқаро танишини тепиб ўлдириб қўйгани ҳақида хабар берилганди. Шунингдек, Тошкент шаҳар ИИББ Чилонзорда 10 дан ортиқ ёшлар қатнашган жанжал юзасидан изоҳ берганди.
