Ўзбекистон волонтёрлари ассоцияцияси ташкил этилди

Адлия вазирлиги томонидан 4 декабрь куни Ўзбекистон волонтёрлари ассоциацияси давлат рўйхатидан ўтказилди. Бу ҳақда Ёшлар ишлари агентлиги ахборот хизмати «Tez News»га маълум қилди.

Фото: Адлия вазирлиги ахборот хизмати

Таъкидланишича, Ўзбекистонда волонтёрлик фаолиятини қўллаб-қувватлаш мақсадида «Волонтёрлик фаолияти тўғрисида»ги қонун қабул қилинган. Унга кўра, волонтёрлик орқали кам таъминланганларга, кўп болалиларга, бошпанасизларга ёрдам кўрсатиш, беморларни, ногиронлиги бўлган шахсларни, қарияларни парваришлаш, спорт, маданий ва бошқа тадбирларни ташкил этишга кўмаклашиш ҳамда бошқа усулларда хайрия ишларини амалга ошириш мумкин.

Қайд этилишича, бугунги кунда 80 дан ортиқ мамлакатда йирик профессионал волонтёрлик ташкилотлари мавжуд. Кўнгиллилар сектори жамият ижтимоий-иқтисодий ривожланишининг муҳим таркибий бўлагини ташкил этган.  Шунингдек, ассоциациянинг асосий мақсади волонтёрлик фаолиятини ташкил этиш ташаббусларини ривожлантириш, қўллаб-қувватлаш ҳамда волонтёрларнинг ҳуқуқ ва манфаатларини ҳимоя қилишдан иборат.

«Ассоциациянинг ташкил этилганини ‘5 декабрь — Халқаро волонтёрлар куни’га муносиб совға деб ҳисоблаш мумкин», дейилади хабарда.

Аввалроқ Жаҳонгир Ортиқхўжаевнинг волонтёрлик ҳақида билдирган фикрининг тўлиқ талқини эълон қилингани ҳақида хабар берилганди. Ўзбекистонда коронавирус бўйича саволларга жавоб берувчи Call-марказ фаолияти вақтинчалик тўхтатилгани ҳақида хабар берилган.