Россияда ўзбекистонлик эркак пиво тайёрланадиган идишда чўкиб кетди
Россиянинг Москва вилоятида Ўзбекистон фуқароси пиво тайёрланадиган чан (идиш) ичига тушиб кетди.
Маълум қилинишича, кўнгилсиз ҳодиса 3 июнь куни соат 14:00 ларда содир бўлган. Хусусий пиво тайёрлаш корхонаси эгаси 47 ёшли Улуғбекдан ҳудудни ободонлаштиришни сўраган. Шундан кейин тадбиркор иши бўйича чиқиб кетган.
Орадан қанчадир вақт ўтгач қайтиб келган тадбиркор ёлланма ишчини топа олмаган. Пиво корхонаси ходими 2 минг литрга мўлжалланган улкан чанлардан бирининг қопқоғи очиқ эканини маълум қилган. Шунингдек, ачитқи солинадиган кран ҳам очиқ бўлиб чиққан.
Ходимлар чан ичини кўздан кечирганида, у ерда ўзбекистонликнинг жасади ётганини кўрган. Ҳодиса жойига етиб келган тиббиёт ходимлари эркак карбонат ангидриддан заҳарланганини маълум қилган.
Пиво корхонаси ва полициячиларнинг версиясига кўра, ишчи раҳбар йўқлигидан фойдаланиб, пиво ичишга уринган. Марҳум кранни очган, ундан ачитқи туша бошлаган ва бу уни қониқтирмаган. Шунда у ичимликни тепадаги люк орқали олишга қарор қилган ва ичига тушиб кетган, натижада буғдан заҳарланган.
