O‘zbekiston elchixonasi Rossiyadagi o‘zbekistonliklardan chegaradan o‘tkazib qo‘yishni va’da qilayotganlarga ishonmaslikni so‘radi
O‘zbekistonning Rossiyadagi elchixonasi Rossiyada bo‘lib turgan fuqarolarga murojaat bilan chiqdi. Unda fuqarolardan Qozog‘iston orqali O‘zbekistonga kirishni va’da qilayotganlarga ishonmaslik, epidemiya xavfi tarqalmaguncha bir joyda to‘planmaslik, vaziyat barqarorlashishini kutish so‘ralgan.
Skrin: Video
O‘zbekistonning Moskva shahridagi Elchixonasi ma’lumotiga ko‘ra, so‘nggi vaqtlarda ijtimoiy tarmoqlar va ommabop messenjerlarda Rossiya Federatsiyasi va Qozog‘iston Respublikasi o‘rtasidagi chegara ochilgani hamda Rossiyadagi O‘zbekiston fuqarolari Qozog‘iston hududi orqali vatanga qaytishlari mumkinligi haqidagi yolg‘on xabarlar tarqalmoqda. Bundan tashqari, yo‘lovchi tashish bilan shug‘ullanadigan ayrim shaxslar Rossiya-Qozog‘iston chegarasiga odamlarni yetkazib qo‘yish va chegarani kesib o‘tishda “yordam berish”ni va’da qilib turli e’lonlar tarqatmoqdalar.
Elchixona vatandoshlarimizdan bu kabi yolg‘on xabarlarga ishonmasliklarini so‘rab qoladi. Rossiya, O‘zbekiston va Qozog‘istonda joriy qilingan karantin choralari, shu jumladan mamlakatlarga kirish bo‘yicha cheklovlar o‘z kuchida qolmoqda.
Afsuski, shu kunlarda Samara viloyatidagi Bolshaya Chernigovka qishlog‘i, Orenburg viloyatidagi Buzuluk tumani va Sol-Iletsk shahrida O‘zbekiston fuqarolarining to‘planishi kuzatilmoqda. Ularning ko‘pchiligi, yolg‘on xabarlarga ishonib, Rossiyaning turli hudularidan kelgan va Qozog‘iston orqali O‘zbekistonga qaytish istaginini bildirmoqda.
Koronavirus infeksiyasi tarqalayotgan bir paytda fuqalorning bir joyda to‘planishi ularning virus bilan kasallanish ehtimolini keskin oshiradi. Bunday holat ayniqsa, qariyalar, kasallar, doimiy kasalligi bor fuqarolar uchun xavflidir, deyiladi rasmiy murojaatda.
Shuningdek, elchixona Rossiya hududidagi fuqarolardan turli yolg‘on xabarlar va mish-mishlarga ishonmasliklarini, Rossiya-Qozog‘iston davlatlararo chegara punktlariga borishga urinmaslik, hozirgi yashash joylarida qolib, karantin choralariga qat’iy rioya qilishlarini so‘ragan.
Eslatib o‘tamiz, O‘zbekiston Respublikasi Jinoyat kodeksiga muvofiq karantinli va inson uchun xavfli bo‘lgan boshqa yuqumli kasalliklar tarqalishi haqida haqiqatga zid ma’lumotlarni tarqatish uchun javobgarlik belgilanagan. Xususan, mazkur ma’lumotlarni nashr qilish yoki boshqacha usulda ko‘paytirilgan matn yoki OAV, shuningdek internet orqali tarqatish bazaviy hisoblash miqdorining 200 baravaridan (44 mln 600 ming so‘mdan) 400 baravarigacha (89 mln 200 ming so‘m) miqdorda jarima yoki 300 soatdan 360 soatgacha majburiy jamoat ishlari, 2 yildan 3 yilgacha axloq tuzatish ishlari yoki 3 yilgacha ozodlikni cheklash yohud ozodlikdan mahrum qilish bilan jazolanadi.
Bundan tashqari, Rossiya qonunchiligiga binoan, og‘ir oqibatlarga olib keladigan yolg‘on ma’lumotni bila turib tarqatish 300 mingdan 2 million rublgacha jarima hamda uch yildan besh yilgacha ozodlikdan mahrum qilish bilan jazolanadi.
