Сенат ялпи мажлисида қишлоқ хўжалиги ўсимликлари ҳимоясига оид қонун рад этилди
Олий Мажлис Сенатининг 7 август кунги олтинчи ялпи мажлиси кун тартибига киритилган янги таҳрирдаги «Қишлоқ хўжалиги ўсимликларини зараркунандалар, касалликлар ва бегона ўтлардан ҳимоя қилиш тўғрисида»ги Ўзбекистон Республикаси қонуни сенаторлар томонидан рад этилди. Бу ҳақда Сенат матбуот хизмати хабар берди.
Фото: Сенат матбуот хизмати
Қайд этилишича, қонун тегишли вазирлик ва идоралар мутахассислари ҳамда экспертлар иштирокида ҳар томонлама ўрганиб чиқилгандан сўнг уни тамомила қайта кўриб чиқиш зарур деган хулосага келинган.
Маълум бўлишича, ҳужжатда ўсимликларни зарарли организмлардан ҳимоя қилишда қўлланиладиган кимёвий бирикмалар ва тавсия этилган кимёвий ҳамда биологик воситалар, ўғитлар ва бошқа препаратларнинг рўйхати келтирилмаган. Шунингдек, улардан самарали ва безарар фойдаланишнинг асосий мезон ҳамда меъёрлари очиб берилмаган.
Бундан ташқари, қонунда ўсимликларни ҳимоя қилиш объектлари ҳамда субъектларини аниқлаш, уларнинг ҳуқуқ ва мажбуриятларига оид масалалар акс этмаган. Қолаверса, қишлоқ хўжалигида халқаро талабларга жавоб берадиган маҳсулотларни етиштиришда пестицидлар стандарт меъёрларини таъминлаш мақсадида радиологик, токсикологик кузатув ва ташхисларга доир жиҳатлар ёритилмаган.
Фото: Сенат матбуот хизмати
Шу билан бир қаторда, қонунда янги пестицидлар ва агрокимёвий воситаларни рўйхатга олиш ва воситани Ўзбекистон Республикаси қишлоқ хўжалигида ишлатиш учун рухсат бериш талаблари баён этилмаган. Aграр тармоқда ўсимликларни янги навлари, турларини жорий этиш натижасида зараркунанда, касаллик ва бегона ўтларнинг аввал учрамаган турлари тарқалишини ўрганиш масалаларига доир нормалар белгиланмаган.
Экспертларнинг фикрича, қонун нормаларини ўсимликлар карантини ва уларнинг муҳофазаси тўғрисидаги бошқа қонун ҳужжатлари ва халқаро ҳужжатларга мувофиқлиги юзасидан кўриб чиқиш лозим. Бундан ташқари, қонун моддаларининг баён этилиши қонунчилик техникаси талабларига жавоб бермайди.
Қонунда тартибга солинадиган жамоатчилик муносабатларининг аҳамиятини эътиборга олиб, сенаторлар ушбу қонун консепсиясини қайта кўриб чиқишни, унга комплекс ёндашиб, халқаро нормаларни имплементация қилиб, такомилига етказишни, шунингдек, амалдаги қонунларни хатловдан ўтказиш ва уларга ушбу қонуннинг қоидаларини киритишни мақсадга мувофиқ деб ҳисоблади.
Aввалроқ Сенат ялпи мажлисида 25 нафар мансабдор шахсни лавозимидан озод этиш бўйича таклифлар киритилгани маълум қилинганди. Шунингдек, Танзила Норбоева карантин чоралари босқичма-босқич бекор қилинишини таъкидлаган.
Эслатиб ўтамиз, 6 август куни Шавкат Мирзиёев қишлоқ хўжалиги соҳасига ажратилган кредитнинг бир долларини уч долларга айлантириш зарурлигини таъкидлагани ҳақда хабар берилганди.
