ССВ: Ўзбекистонда коронавирус беморларини қабул қилган хусусий клиникалар даволаш стандартларини бузса, лицензияси бекор қилинади
Соғлиқни сақлаш вазирлигида 7 август куни COVID-19 инфекциясини аниқлаш ва даволашда қатнашаётган хусусий тиббиёт муассасаларининг вакиллари иштирокида йиғилиш ўтказилди. Унда Соғлиқни сақлаш вазири ўринбосари Улуғбек Собиров COVID-19 инфекциясини даволаётган нодавлат тиббиёт муассасаларида ўтказилган мониторинг натижалари тўғрисида маълумот берди, дея хабар бермоқда вазирлик матбуот хизмати.
Маълум қилинишича, Тошкент шаҳрида жами 14 та хусусий клиника коронавирусга чалинган беморларни қабул қилмоқда. Шулардан фақат 7 таси даволашни бошлаш учун санитария-эпидемиология қоидалари ва даволаш стандартларига риоя қилиш бўйича Тошкент шаҳар соғлиқни сақлаш бошқармаси билан шартнома имзолаган. COVID-19 инфекциясини даволаётган хусусий тиббиёт ташкилотларининг аксариятида зарур тиббий асбоб-ускуналар етишмайди, тегишли мутахассислар мавжуд эмас. Шунингдек, улар орасида санитария-эпидемиология қоидаларига ҳамда Соғлиқни сақлаш вазирлиги томонидан тасдиқланган стандартларга риоя қилмасдан иш юритаётганлари мавжуд.
Тошкент врачлар малакасини ошириш институти Aнестезиология ва реаниматология кафедраси ассистенти Aлла Россталная хусусий клиникаларда COVID-19 инфекциясидан даволанаётган беморларга юритилган касаллик тарихларини таҳлил қилар экан, уларга керагидан ортиқ дори-дармонлар, тегишли кўрсатма мавжуд бўлмаса-да, икки ва ундан ортиқ антибиотиклар берилганлигини, даволаш стандартларига зид равишда инфузион суюқликлар қуйилганлигини кўрсатиб берди.
Мутахассисларнинг хулосаларига кўра, COVID-19 инфекцияси билан касалланишнинг дастлабки босқичида турли инфузион суюқликлар билан даволаш, биттадан ортиқ антиботикни қўллаш касалликнинг тез суратларда оғир шаклига ўтиб кетишга сабаб бўлмоқда. Мониторинг давомида хусусий тиббиёт ташкилотларида айнан шундай хатоликларга йўл қўйилгани қайд этилди.
Йиғилишда Соғлиқни сақлаш вазирлиги Лисензиялаш ва аккредитасиялаш бошқармасига ҳудудий санитария-эпидемиология ташкилотлари билан биргаликда хусусий тиббиёт ташкилотларининг коронавирусга чалинган беморларни даволаш билан боғлиқ фаолиятини мониторинг қилиб бориш, даволаш стандартларини бузган хусусий клиникаларга нисбатан қатъий чоралар кўриш, шу жумладан, уларнинг лицензияларини бекор қилиш бўйича судларга даъво аризаларини киритиш бўйича топшириқлар берилди.
Маълумот учун, Ўзбекистонда коронавирус инфекцияси қайд этилганлар сони 7 август соат 17:00 ҳолатига кўра, 29 057 нафарни ташкил этган. Aйни пайтга қадар 20 059 нафар коронавирус инфекциясига чалинган фуқаролар (69 фоиз) соғайган. Ҳозирда 8817 нафар беморга шифокорлар томонидан белгиланган стандартлар бўйича даво чоралари кўрилмоқда.
