Танзила Норбоева коррупция олий таълимнинг барча босқичида борлигини маълум қилди
Олий Мажлис Сенатининг олтинчи ялпи мажлиси 7 август, жума куни ўз ишини бошлади. Сенат раиси Танзила Норбоева олий таълимдаги коррупция билан боғлиқ вазият ҳақида гапирди.
Фото: Олий Мажлис Сенати ахборот хизмати
«Таълим тизимини, айниқса, олий таълимни коррупция иллатидан буткул халос этишимиз керак. Таҳлилларга кўра, олий таълимда коррупция ҳолати деярли барча босқичда бор. Талабаликка қабул қилишдан тортиб, ўқиш жараёни ва ўқишни кўчиришгача бўлган босқичларда кенг тарқалган», — дейди Сенат раиси.
Шунингдек, Танзила Норбоева бундай ҳолатлар таълим сифатини туширибгина қолмай, мамлакатнинг халқаро рейтингдаги ўрнига ҳам жиддий салбий таъсир қилаётганини қўшиб қўйди.
Аввалроқ Олий Мажлис Сенати вилоятлардаги Санитария-эпидемиология хизмати мутасаддилари томонидан коронавирусга қарши кураш тадбирлари учун ажратилаётган маблағларнинг қанча миқдори талон-торож қилинганлигини маълум қилган эди. Шунингдек, Сенат раиси 25 нафар мансабдор шахсни лавозимидан озод этиш бўйича таклифлар киритилганини билдиргани ҳақида хабар қилинган эди.
