Карантин даврида вилоятлардаги тадбиркорларнинг пойтахтга кириш талаблари маълум қилинди

Карантин режими вақтида фуқаролардан келиб тушаётган савол ва мурожаатларга ички ишлар вазири матбуот котиби, вазирнинг ахборот сиёсати масалалари бўйича маслаҳатчиси Шоҳрух Ғиёсов жавоб берди. Бу ҳақда Telegram’даги «Расмий хабарлар» каналида маълум қилинди.

Жумладан, Наманганда тадбиркорлик билан шуғулланувчи фуқаро Тошкентдан ускуна харид қилмоқчилигини маълум қилиб, пойтахтга бориб, уни олиб келиш учун қандай хужжатлар кераклигини сўраган.

«Республика махсус комиссиясининг автотранспорт воситаларида ҳаракатланишига махсус рухсатнома талаб этилмайдиган ҳолатлар рўйхатининг 14-бандига мувофиқ, N1, N2, N3 тоифадаги транспорт воситалариларининг ҳаракатига рухсат берилган. Сиз ушбу харидларни махсус комиссиянинг баён талабларига тўлиқ амал қилган ҳолда амалга оширишингиз мумкин», — дейди Шоҳрух Ғиёсов фуқарога берган жавобида.

Aввалроқ Шавкат Мирзиёев карантин чекловларини узайтириш таклифига розилик билдиргани хабар қилинганди. Президентнинг қайд этишича, бугунги кунда энг муҳим вазифа аҳоли ўртасида вирус занжирини узиш ҳисобланади.

Эслатиб ўтамиз, Ўзбекистонда 10 июлдан 1 августгача карантин тартиби кескин кучайтирилгани, 13 июлдан маҳаллий поезд ва авиақатновлар тўхтатилиб, қўшимча карантин қоидалари кучга киргани ҳақда хабар берилганди. Кейин, карантин чекловлари 15 августгача узайтирилди.

Маълумот учун, Танзила Норбоева карантин чоралари босқичма-босқич бекор қилинишини маълум қилди.