«Зоҳиршоҳ, Шоҳжаҳон, хоҳласангиз, рингда гаплашамиз». Санжай уни «фаросатсиз» деганларга мурожаат қилди

Хонанда Санжай YouTube’даги «Chotki TV»га берган интервьюсида Шерали Жўраевнинг ўғиллари Шоҳжаҳон ва Зоҳиршоҳ Жўраевга мурожаат йўллади.

Кадр: YouTube

У мазкур интервьюда ота-онаси қандай касб билан шуғулланиши ва Зоҳиршоҳнинг гаплари уларни ҳафа қилганини маълум қилган.

«Зоҳиршоҳ, хоҳласангиз, олдимга келиб айтинг, ‘лично’ ўзимга, ёки хоҳламасангиз, интернетда мурожаат қилинг. Ким тарбия берган, тарбиясиз, фаросатсиз деган жойлар бор… Укажон, кўпми камми минимум 12 ёш фарқимиз бор. Мен юрган ерларда, мен ётган кўчадаги ўриндиқларда, оч-наҳор қолган пайтларим… Буларни сен кўрмагансан. Сен отангни орқасидан кўп нарсага эришган одамсан. Менинг отам лекин оддий заводда ишлаган одам, онам эса оддий ҳамшира. Лекин бу тарбияни ёмон берди дегани эмас. Уларнинг қалбини оғритдинг сен», — дейди хонанда Санжай.

У бу гапларни айтгандан сўнг Зоҳиршоҳ ва Шоҳжаҳон Жўраевни юзма-юз гаплашишга таклиф қилган:

«Зоҳиршоҳ, Шоҳжаҳон хоҳласангиз кўчада гаплашамиз, хоҳласангиз рингда гаплашамиз, хоҳласангиз судда гаплашамиз, хоҳласангиз саҳнада гаплашамиз. Мен ўғил боламан, ҳар битта айтган гапимга жавоб бераман».

Эслатиб ўтамиз, хонанда Зоҳиршоҳ Жўраев отасининг қўшиқларини ҳеч қандай рухсатсиз, шартнома тузмасдан айтиб келаётган Санжайни қаттиқ танқид қилгани айтилган эди. 3 декабрь куни хонанда Санжай ўзининг Instagram саҳифасида Зоҳиршоҳ Жўраев билан ёзишмасини эълон қилди. У ёзишмани видео шаклида жойлаган ва «Мени фаросатсиз деган одамга жавобим шунақа» дея изоҳ қолдирган.

Шунингдек, Санжай 3 декабрь куни қўйган постида Зоҳиршоҳ Жўраевга «кел бошқача жавоб қил» дея изоҳ қолдирган:

«Кел бошқача жавоб қил! Хоҳлаган вақтингда, хоҳлаган жойингда! Фаросат хақида сен менга гапирма, кўрдим берган интервьюнгни, мен рэпер эмасман, сен биринчи жанр ажратишни ўрганиб ол! Мен лично сенга берганман қўшиқни, дадангга кўрсатгин, розиликларини олиб бер деб! Ўғил бола эмасман, агар шу гаплар бўлмаган бўлса!».

Шундан сўнг Шоҳжаҳон Жўраев 4 декабрь куни ўзининг Instagram’даги саҳифасида журналист Феруза Фаттоҳова томонидан эълон қилинган постни жойлади. У Жўраевлар оиласи Санжай томонидан қўшиқларнинг кавер қилинишига эмас, «Карвон» қўшиғига ишланган клипда Шерали Жўраевнинг сурати деворга чизиб кўрсатилганига эътироз билдирганини таъкидлаган.