Самарқандда 9 ойлик ўгай қизини ўлдирган эркак 13 йилга қамалди
Самарқанд вилояти Пастдарғом туманида 2021 йил 20 октябрь куни 9 ойлик ўгай фарзандини ўлдирган эркак 13 йилга озодликдан маҳрум қилинди.
Маълум бўлишича, қотиллик содир этган эркакнинг хотини 18 октябрда ишга кетаётганини айтиб, уйдан чиқиб кетган. Аммо 2 кун мобайнида уйга қайтмаган. Бундан жаҳли чиққан эркак чақалоқни қўлига олиб, ерга ташлаб юборган ва беланчакка қайта солиб қўйган.
Суд- тиббий экспертизаси хулосасига кўра, бола танасида кўкрак қафаси, чап лунж соҳаларида қонталашлар, калла юмшоқ тўқимасида, бош мия пардалари ости тўқимасида ва қоринчаларида қон қуйилиши жароҳатлари аниқланган. Бу жароҳатлар ўтмас тиғли жисмлар ёрдамида амалга оширилган.
Қотиллик иши Жиноят ишлари бўйича Самарқанд тумани судида кўриб чиқилган. Унга кўра, эркак Жиноят кодекси 97-моддаси (Қасддан одам ўлдириш) 2-қисми «в», «ж» бандлари билан айбдор деб топилган. Суд 57-модда (Енгилроқ жазо тайинлаш)ни қўллаб, эркакка 13 йилга озодликдан маҳрум қилиш жазосини тайинланган.
