Тошкентда бошпанасиз қолган бухоролик аёлга ёрдам берилди
Тошкентга ишлаш мақсадида келиб, бошпанасиз қолган бухоролик аёл Тошкент шаҳар ИИББга мурожаат қилди. Бу ҳақда Тошкент шаҳр ИИББ хабар бермоқда.
Маълум қилинишича, Тошкент шаҳар ИИББга оғир шароитда бошпанасиз қолган бухоролик аёл ёрдам сўраб мурожаат қилган.
«Бухоролик 30 ёшли Салима (исм ўзгартирилган) билан Чилонзор тумани ИИО ФМБ хотин-қизлар масалалари бўйича инспекторлар боғланиб, уни ички ишлар бўлимига олиб келишди ва шахсини аниқлаб, қийинчиликлар сабаби ҳақида суриштиришди. Салиманинг сўзларига кўра, ота-онаси ҳаётдан кўз юмгач уларнинг оиласи моддий қийинчиликка дуч келган.
2017 йили Салима пойтахтга ишлаш мақсадида келган. Дугонаси билан Чилонзор туманидаги хонадонда ижарада турган ва кафеда ҳамда қандолат ишлаб чиқариш корхонасида ишлаб юрган. Кейинчалик бир йигит билан танишиб, у билан бирга яшай бошлаган. Яқинда қиз фарзандли бўлган. Боланинг отаси эса унга моддий ёрдам беришдан ва гўдакнинг тартибяси билан шуғулланишдан бош тортган», — дейилади хабарда.
Салиманинг ҳолатини ўрганиш мақсадида Бухоро вилояти ИИБга тегишли ҳужжатлар йўналтирилди. Салима ва унинг фарзанди эса Чилонзор туманидаги дугонасининг уйига вақтинчалик жойлашган.
Эслатиб ўтамиз, аввалроқ Тошкентда фарғоналик аёл электрузатиш тармоғи устунидан сакраб, ўз жонига қасд қилмоқчи бўлган эди.
