Астраханда қолиб кетган юзга яқин ўзбекистонлик поезд орқали Тошкентга олиб келинади
Россиянинг Астрахан вилоятида қолиб кетган юзга яқин Ўзбекистон фуқароси поезд орқали мамлакатга олиб келинади. Бу ҳақда «Sputnik» хабар берди.
Маълум қилинишича, Россия ҳукумати ва Ўзбекистон консуллиги билан биргаликда Астрахан вилояти «Қораўзак» назорат-ўтказиш пункти яқинидаги вақтинчалик лагерда бўлган барча ўзбекларни мамлакатига қайтаришга келишиб олган.
Хабарга кўра, «Волжский» станциясидан Тошкентга йўл олган махсус поездларга қўшимча учта вагон бириктирилади. Йўловчилар белгиланган манзилга автобусларда олиб борилади.
Аввалроқ Москвадан 442 нафар ўзбекистонлик чартер рейс орқали ва Самарадан 700 нафардан ортиқ Ўзбекистон фуқароси ватанга қайтарилгани ҳақида хабар қилинган эди.
Шунингдек, Россиядан Ўзбекистон фуқароларини олиб келиш учун қўшимча поезд қатновлари йўлга қўйилгани ҳамда Абхазиядан 300 га яқин ўзбекистонлик махсус чартер рейси орқали олиб келингани маълум қилинганди.
