Австралияда COVID-19’га қарши эмланганларда ОИТВ аниқланди

Австралияда COVID-19’га қарши UQ-CSL v451 вакцинасини қабул қилган одамларда ОИТВ (одам иммунитет танқислиги вируси) аниқлангани сабабли вакциналарни ишлаб чиқариш бир муддат тўхтатилади. Бу ҳақда Квинсленд университети ва «CSL Limited» биотехнология компаниясининг қўшма баёнотига таяниб, «ТАСС» хабар берди.

Фото: «Associated Press»

Маълумотларга кўра, Квинсленд университети ва «CSL Limited» компанияси Австралия ҳукумати билан келишган ҳолда UQ-CSL v451 вакцинасининг II ва III босқич синовларини тўхтатиб туришга қарор қилган. Бунинг сабаби сифатида эса препаратнинг ОИТВ инфекциясини текширишга халақит бергани кўрсатилган. Вакцинани қабул қилиб кўрган баъзи одамларнинг ОИТВ учун топширган тестлари сохта ижобий натижани кўрсатган. Уларда эмланишдан олдин салбий натижа қайд этилган эди.

Таъкидланишича, синовларнинг муваффақиятсиз якунланган биринчи босқичидан сўнг Австралия Миллий хавфсизлик қўмитаси UQ-CSL v451 вакцинасини ҳукуматнинг пандемия стратегиясидан чиқариб ташлаш ва эътиборни бошқа дори воситаларининг қўшимча дозаларини сотиб олишга қаратиш тўғрисида қарор қабул қилди.

Ҳукумат раҳбарининг таъкидлашича, Квинсленд университети ва «CSL Limited» биотехнология компанияси томонидан яратилган 51 миллион дозали вакцина ишлаб чиқариш бўйича келишув бекор қилингандан сўнг инглиз-швед компаниялари — «AstraZeneca» ва «Novavax»дан вакциналар сотиб олиш кўпаяди. Австралия ҳукумати «Pfizer»/«BioNTech» вакцинасининг етказиб берилишига ҳам рози бўлган.

Аввалроқ австралиялик олимлар болаларда коронавирус вакцинасининг кутилмаган таъсирини аниқлагани ҳақида хабар берилган эди. Шунингдек, Американинг «Pfizer» ва Германиянинг «BioNTech»компаниялари томонидан биргаликда ишлаб чиқилган вакцина синовларида олти киши вафот этгани маълум қилинган.