Европа Иттифоқи Туркияга қарши санкцияларни қабул қилди
Европа Иттифоқига аъзо давлатлар раҳбарлари Туркияни Шарқий Ўрта ер денгиздаги Кипр ҳудудий сувларида бурғулаш ишларини ноқонуний олиб борганликда айблаб, унга қарши санкция қабул қилди. Бу ҳақда 11 декабрь, жума куни «Deutsche Welle» хабар берди.
Фото: «Getty Images»
Маълум қилинишича, Европа Иттифоқи саммитида раҳбарлар Туркияни Ўрта денгиздаги газ конларини қидиришда иштирок этган Туркиянинг жисмоний шахслари ва компанияларига қарши санкциялар тўғрисида келишиб олган. Ноябрь ойида Иттифоқ бу санкцияларни бир йилга — 2021 йилнинг 12 ноябригача узайтирган эди. Айни вақтда жорий этилган санкциялар рўйхатига Туркиянинг икки нафар фуқароси киритилган.
Таъкидланишича, санкцияларга Европа Иттифоқи ҳудудига киришни тақиқлаш ва активларни музлатиш киради. Санкциялар бўйича якуний қарор Европа Кенгаши томонидан қабул қилинади.
Шунингдек, Греция ва Кипр Европа Иттифоқидан Туркияга қарши санкцияларни кучайтиришни талаб қилмоқда. Таъкидланишича, Иттифоқ раҳбарлари индивидуал санкцияларни узайтиришга келишиб олган.
Аввалроқ Эрдўғон Туркиянинг АҚШ санкцияларидан қўрқмаслигини маълум қилган эди.
