Мактабларда иситиш тизими яхши ишламаса, кимга мурожаат қилиш керак? ХТВ жавоб берди
Халқ таълими вазирлиги 11 январь куни ота-оналарга мурожаат йўллаб, мактабларда иситиш тизими яхши ишламаса, ҳудудий штабларга хабар бериши мумкинлигини таъкидлади.
Фото: «Tez News»
Хабарга кўра, умумтаълим мактабларининг иситиш тизимининг куз-қиш мавсумида барқарор ишлаши, улардаги муҳандислик коммуникацияларнинг ишчи ҳолатда сақланиши, шу йўналишда олиб бориладиган қурилиш-таъмирлаш ишларига маҳаллий давлат ҳокимият органлари масъул этиб белгиланган.
Таъкидланишича, Қорақалпоғистон Вазирлар Кенгаши, вилоятлар ва Тошкент шаҳар ҳокимликларига қишки мавсумда барча мактабларнинг иссиқлик тизимини барқарор ишлаши бўйича тегишли топшириқлар берилган, шунинг учун агарда жойларда муаммолар бўлса, ҳудудий штаблар орқали оператив равишда чоралар кўриб борилмоқда. Мазкур масалада Халқ таълими вазирлигининг ҳудудлардаги штаблари ташкил этилган бўлиб, уларга мазкур ҳаволадаги рақамлар орқали мурожаат қилиш имконияти ҳам мавжуд.
«Агар сиз ҳудудлардаги штабларга мурожаат қилган бўлсангиз, аммо ҳали хам мактабингизда иссиқлик тизимининг ишлаши билан боғлиқ муаммолар мавжуд бўлса, Халқ таълими вазирлигининг (71) 202 09 09 рақамли мурожаатлар марказига мурожаат қилишингиз ҳам мумкинлигини маълум қиламиз.
Ушбу мурожаатларни республика куз-қиш штаби ҳамда ҳудудий штаблар билан ҳамкорликда ҳал этиш чоралари кўрилади», дейилади хабарда.
Мавзуга доир:
Эслатиб ўтамиз, аввалроқ Ўзбекистонда 11 январдан барча мактабларда ўқиш тўлиқ анъанавийга ўтказилиши ҳақда хабар қилинган эди.
