TikTok’да 15 ёшгача бўлган фойдаланувчилар фақатгина ёпиқ аккаунт очиши мумкин бўлади

TikTok видео хизмати вояга етмаганлар учун хавфсизлик созламаларини янгилайди ва автоматик равишда 15 ёшгача бўлган фойдаланувчилар аккаунтини ёпиқ тартибга ўтказади. Бу ҳақда платформанинг расмий сайтида айтилган.

Фото: «Teen Vogues»

Таъкидланишича, шахсий профилларга жойлаштирилган видеоларни фақат эгаси томонидан тасдиқланган обуначилар кўришлари мумкин. Бундан ташқари, 15 ёшгача бўлган фойдаланувчилар ўз профилларини бошқаларга таклиф қила олмайди.

«Янги чекловлар билан видео сервис ёш тиктокерларга контент яратишда жиддийроқ бўлишига имкон яратмоқчи», — деб тушунтиради TikTok.

Ҳисобларни ёпиқ қилиш билан бир қаторда, хизмат 16 ёшгача бўлган фойдаланувчилар томонидан жойлаштирилган видеоларга изоҳ қолдиришни ҳам чеклайди. Улар постларни муҳокама қилишни ўчириб қўйишлари ёки уларни фақат дўстларига тақдим этишлари мумкин. Дуэт қилишда ҳам 16 ёшдан катта бўлиш чеклови киритилиши мумкин.

Бундан ташқари, агар фойдаланувчи 16 ёшдан кичик бўлса, бошқа аккаунтлар унинг видеосини юклаб олиш имкониятига эга бўлмайди. Компания сиёсатига кўра, дастурдан 13 ёшдан катта шахслар фойдаланиши мумкин.

2019 йил февраль ойида АҚШ Федерал савдо комиссияси TikTok’ни болаларнинг интернетдаги шахсий ҳаётини ҳимоя қилиш тўғрисидаги қонунни бузгани учун 5,7 миллион доллар миқдорида жаримага тортган эди. Қонунга кўра, веб-сайтлар ва интернет хизматлари 13 ёшгача бўлган фойдаланувчиларнинг шахсий маълумотларини йиғишдан олдин ота-оналарнинг рухсатини олишлари керак.

Аввалроқ Россиядаги университетларнинг бирида TikTok факультети очилиши мумкинлиги ҳақида хабар берилган эди.