Вьетнам Россиядан коронавирусга қарши ишлаб чиқилган вакцинасини сотиб олмоқчи
Вьетнам соғлиқни сақлаш вазирлиги Россиянинг коронавирусга қарши ишлаб чиқилган вакцинасини сотиб олиш учун сўров юборди. Бу ҳақда 14 август куни Вьетнам телевидениесида хабар берилди, деб ёзади «Reuters».
«Шу билан бирга, Вьетнам ўзининг COVID-19’га қарши вакцинаси устида ишлашни давом эттиради», — дейилади эфирда.
Вьетнам Россияга қанча миқдорда вакцина буюртма бергани ва қачон уларни олишини эфирда маълум қилмаган. Вазирлик июль ойида мамлакатнинг маҳаллий вакцинаси 2021 йилнинг охиригача тайёр бўлишини маълум қилган эди.
Маълумот учун, Вьетнамда 14 август 13:00 ҳолатига кўра, жами касалланганлар сони 911 тани ташкил этмоқда. 430 киши соғайган, 21 киши вафот этган.
Аввалроқ Россияда коронавирусга қарши ишлаб чиқарилган вакцинанинг экспорт нархи эълон қилинган эди.
