Бухорода иш вақтида автоҳалокатга учраган фуқарога Халқ қабулхонаси жарроҳлик амалиётини ўтказишда ёрдам берди
Бухоро тумани «Янги турмуш» МФЙ Кечқаноқ қишлоғида яшовчи Ойсултон Хидирова 2019 йил 10 октябрь куни Халқ қабулхонасига мурожаат қилиб, автоҳалокатга учраган отаси Раҳмонқули Хидировга жарроҳлик амалиёти ўтказиш учун ёрдам сўраган. Бу ҳақда «ЎзА» хабар берди.
Мурожаатда унинг отаси тумандаги йўл хўжалиги пудрат таъмирлаш-фойдаланиш корхонасида ишчи бўлиб ишлаши ҳамда хизмат вақтида уни машина уриб кетгани баён қилинган. Маълум бўлишича, мурожаатчининг онаси эрта вафот этган, оилада яна икки нафар вояга етмаган укаси бор.
«Мутахассислар томонидан бу оиланинг аҳволи ўрганилди. Улар чиндан ҳам кўмакка муҳтож экани аниқланди. Шундан сўнг Р.Хидировга жарроҳлик амалиётини ўтказиш учун имтиёзли йўлланма ажратилди. Жорий йил 17 январь куни тўлиқ муолажаларни олиб қайтган Р.Хидировга ногиронлик белгиланиб, нафақа тўлаш йўлга қўйилди», – дейди туман Халқ қабулхонаси мудири Барот Болтаев.
Хабарда Ойсултон Хидирова ва унинг укаси Суннат Хидиров тумандаги қурилиш коллежи битирувчиси экани қайд этилган. Шунингдек, туман Халқ қабулхонаси ходимлари томонидан бу оиланинг 2 нафар ишга яроқли аъзоларини мутахассислиги бўйича ишга жойлаштириш ва таъмирталаб уйларини таъмирлаш ишлари бўйича режалар амалга оширилаётгани ҳам маълум қилинган.
Аввалроқ Андижонда халқ қабулхоналари, сектор раҳбарлари ва Ёшлар агентлиги ҳамкорлигида 32 минг 268 нафар ёш иш билан таъминлангани хабар қилинган эди.
