Тошкентнинг икки туманида трансформатор ёниб кетди

Ижтимоий тармоқларда Тошкент шаҳрининг икки туманида «электрошит» ёнаётгани акс этган видеолар тарқалди. Ҳолат бўйича пойтахт Фавқулодда вазиятлар бошқармаси маълумот берди.

Кеча, 17 январь куни соат 17:43 да Сергели туманида трансформатор ёнаётгани бўйича шаҳар ФВБга хабар келиб тушган. Шунга кўра, ёнғин жойига бирламчи ёнғин-қутқарув техникалари соат 17:51 да етиб борган ва соат 17:58 да ёнғин тўлиқ бартараф этилган. Ёнғин оқибатида трансформаторнинг ички қисми ёниб зарарланган.

Шунингдек, кеча, 17 январь куни Шайхонтоҳур тумани, «Жарариқ» мавзесида ҳам трансформатор ёниб кетган. Чақирувга кўра, бирламчи ёнғин-қутқарув техникалари соат 18:55 да ёнғин бўлаётган жойга олиб борилган.

Ҳудуд электр тармоқлари ходимлари трансформаторни электр тизимидан узганидан сўнг соат 19:33 да ёнғин тўлиқ бартараф этилган.