Самарқандда соатига 1,2 минг нафар йўловчига хизмат кўрсатадиган аэровокзал қурилади

Транспорт прокурорининг ўринбосари М.Музаффаров Самарқанд шаҳридаги транспортда хизмати кўрсатиш объектларидаги шароитлар ва амалга оширилаётган қурилиш-монтаж ишлари ҳолатини ўрганди. Бу ҳақда Бош прокуратура хабар берди.

Фото: Бош прокуратура матбуот хизмати

Хабарга кўра, дастлаб Транспорт прокуратураси масъул ходимлари Самарқанд халқаро аэропортининг қурилиш майдонида бўлиб, карантин қоидаларига риоя этилиши ва амалга оширилаётган қурилиш-монтаж ишлари ҳолатини ўрганган. Самарқанд халқаро аэропортида соатига 1200 нафаргача йўловчига хизмат кўрсата оладиган янги аэровокзал мажмуаси қурилаётгани маълум бўлган. Шунингдек, 22 та самолёт учун янги тўхташ, учиш-қўниш йўлаги барпо этилмоқда. Унинг афзаллиги аэропорт барча турдаги самолётларни ҳеч қандай чекловларсиз қабул қилиш имконига эга бўлади.

Фото: Бош прокуратура матбуот хизмати

Бундан ташқари, Транспорт прокуратура ходимлари ташриф давомида ишчи-ходимлар учун яратилган ишлаш ва яшаш шароитларини тўлиқ ўрганди. Жумладан, қурилиш жараёнига жалб этилган ишчи-ходимларга муносиб меҳнат ва яшаш шароитлари яратилгани ҳамда ўз вақтида иш ҳақлари тўлаб берилаётгани борасида ахборот тингланди.

Фото: Бош прокуратура матбуот хизмати

Шунингдек, ишчи гуруҳ Самарқанд темир йўл вокзалида йўловчиларга яратилган шароитлар билан ҳам танишди.

Фото: Бош прокуратура матбуот хизмати

Аввалроқ Ўзбекистонда 20 сентябрдан барча халқаро қатновлар тикланиши, Самарқанд халқаро аэропортига энг яхши ном беришга доир танлов эълон қилингани хабар берилган эди.