Каттақўрғонда 5 ойлик алимент пулини тўламаган шахсга жиноят иши қўзғатилди
Самарқанд вилояти Каттақўрғон туманида 5 ойлик алимент пулини тўламаган шахс қўлга олинди. Бу ҳақда вилоят Ички ишлар бошқармаси хабар берди.
Маълум қилинишича, Каттақўрғон тумани Қорадарё қишлоғида яшовчи 1995 йилда туғилган фуқаро Т.Н. 2020 йилнинг март, апрель, май, июнь ва июль ойлари учун ҳисобланган алимент пулларини тўламасдан келган.
Ушбу шахсга нисбатан Каттақўрғон туман ИИБ ҳузуридаги Тергов бўлими томонидан Жиноят кодексининг 122-моддаси 1-қисми билан жиноят иши қўзғатилган.
Қайд этилишича, ушбу шахс 2020 йил 1 март кунига қадар алиментдан бўлган қарздорлигини тўлаб беришдан бўйин товлаб келганлиги учун Каттақўрғон тумани маъмурий суди томонидан тайинланган 15 сутка маъмурий қамоқ жазосини ўтаб чиққан.
Эслатиб ўтамиз, аввалроқ Самарқандда сариқ рангли металлни тилла деб сотган шахс жиноятини яшириш учун 900 доллар пора бераётганида қўлга олингани маълум қилинган эди. Шунигдек Фарғонада 1 миллион сўмлик телефон ўғирлаган шахс қўлга олингани ҳақида хабар берилди.
